»Mir kennet älles ...«

Hab mal was zusammengereimt - was das "Schwabenklischee" anbelangt ;-)

EIN SCHWABE …

… der muss emmer schaffa:
Häusle baue, Autos macha,
Äpfel lesa für dr oigne Moscht
(weil der lecker – ond nix koscht),
Auf em Acker Krombira klauba,
Reba schneida für sauguate Trauba,
Wo mr dann dr Wein drausmacht;
Der wird als „Viertele“ gern gschlotzt
(selbscht beim vierta no dem Balla trotzt).

Des Höchschte isch für ihn jedoch:
Am Wochaende – sei Kehrwoch!
Mit Kutterschaufel ond mit Besa
Wird überall dr Dreck aufglesa,
Ond wo´s vorher dreckich war,
Blitzt ond glänzt dann des Trottwar;
Selbscht dr Kandel wird fescht gschrubbt,
Weil sonscht dr Nochbr komisch guckt.

Doch am Sonndag – gibt´r Ruh!
Noch dr Kirch goht´s hoim zom Essa
(beim Broda bloß net d´ Soß vergessa!),
Kardoffelsalat – gibt´s au drzu!
En Hefakranz dann zom Kaffee
(am Beschta en dr Kaffee dunka);
"Ach, wie isch´s als Schwob doch schee!"
Denkt mr dann, em Glück versonka …

Doch wenn am Mondag dann dr Weckr,
Wieder läutet en dr Früh,
Hoißd es wieder: „Schaffa ganga!“
Weil: Des Leba – isch au Müh´;
Denn nur wer schaffa ganga duat –
Der lebt sei Schwobaleba richtig guat …